અસાઈડ

આર્થિક ઉપાર્જન નું મહત્વ

મીત્રો , મને આજે એક વોટ્સએપ ફોરવર્ડ મળ્યું જે આપની સાથે શેર્ કરવું જરૂરી છે…

“મુશ્કેલી ના સમય માં પૈસા સિવાય કોઈ નો સહારો હોતો નથી એટલે જીવન માં ક્યારેય પણ આર્થિક સંકળામણ આવે ત્યારે જુની વાતો યાદ કર્યા વગર અને કોઈ ના ભરોસે બેસી રહ્યા વગર જેટલા જલ્દી પૈસા કમાવા માટે ના હથિયાર ઉપાડશો એટલા જલ્દી મુશ્કેલ સમય માં થી બહાર નીકળી શકશો.

સગાવહાલા મિત્રો બધા આશ્વાસન અને સલાહો આપશે એ ખાલી સાંભળવું ગમશે બાકી એના થી મુશ્કેલી નો અંત નહિ આવે , ભગવાન ના સહારે જશો તો પણ કર્મ તો કરવું જ પડશે હા એક જાત ની માનસિક શાંતિ રહેશે બાકી ફક્ત પૂજા પાઠ, કર્મ કાંડ કે ધર્મસ્થાનો ના ચક્કર કાપવા થી પણ એમાં થી બહાર નીકળી ના શકાય

કોઈ કદાચ થોડી ઘણી આર્થિક મદદ કરશે તો પણ એ ક્ષણિક રાહત હશે બાકી પેહલા જેવી આર્થિક પરિસ્થિતિ પર પહોંચવા માટે તો કમાવા સિવાય કોઈ ઉપાય નથી.

અનિલ અંબાણી અને અમિતાભ બચ્ચન જેવા લોકો ના મિત્રો અને સગાવહાલા પણ આર્થિક સંકડામણ વખતે એમના ફોન ઉપાડતા બંધ થઇ જતા હોય તો આપણા જેવા સામાન્ય માણસ માટે તો સગાવહાલા ના ખભે આપણી લાશ જ બહાર નીકળે એટલે આવી પરિસ્થિતિ આવે તો સામાજિક જીવન ના વેવલા વેળા બંધ કરી ને એક જ ધ્યેય કે નીતિ થી પૈસા ક્યાં કમાઈ શકાશે એમાં જ ધ્યાન આપવું બાકી ઘર ના બધા સભ્યો ભેગા બેસી ને રડ્યા કરવા થી પણ એનો ઉકેલ નહિ આવે.

લોકો હંમેશા ફરિયાદ કરતા હોય છે કે અમારા મુશ્કેલ સમય માં કોઈ કામ ના આવ્યું કોઈ કામ આવવા નું પણ નથી કારણ કે બધા ની ખુદ ની જરૂરિયાતો અને જલસા કરવા ની ડિઝાયર અને ભવિષ્ય ની અનિશ્ચિતતાઓ ની બીક એટલી છે કે કોઈ મદદ કરવા આગળ નથી આવવા નું.

કોઈ ને આર્થિક મદદ કરવી હોય તો આપણે ખમી શકીયે એટલી જ મદદ કરવી કારણ કે એનું કઈ તરત પાટે નથી ચડી જવા નું કે એ ઈચ્છતો હોવા છતાં તમારા પૈસા પાછા આપી શકશે

પોતે મોંઘી ગાડીઓ માં ફરતા હોય અને પૈસા તો હાથ નો મેલ છે અને જન્મ્યા ત્યારે બાળોતિયાં માં ખિસ્સા નોહતા અને મરશો ત્યારે કફન માં પણ ખિસ્સા નહિ હોય એવી વાતો કરતા ધર્મગુરુઓ થી દૂર રેહવું કારણ કે ભગવાન ને ધૂપ દિવા કરવા માટે અગરબત્તી લેવા જશો તો પણ કોઈ મફત નહિ આપે.

પૈસા સર્વસ્વ નથી પણ જીવન નિર્વાહ માટે પૈસા ખુબ જરૂરી છે બાકી તો સામાજિક દુઃખો કે શારીરિક બીમારીઓ ગમે તેને આવી શકે છે ગરીબો ને નથી આવતી એવું નથી એટલે એવા સમયે સાઇકલ પર બેઠા બેઠા રડવું એ કરતા મર્સીડીઝ માં બેઠા બેઠા રડવું વધુ સારું.

અસાઈડ

માતૃભાષા દિવસની શુભેચ્છાઓ

આજે માતૃભાષા દિવસ છે.

ગૌરવથી કહીએ હું ગુજરાતી છું, ને મારી ભાષા ઉપર હું ગર્વ કરું છું. કેમ કે જે પામ્યું છે એ આપણી માતૃભાષાને આભારી છે. આપણી જે રીતે ઓળખાણ સ્થાપિત થવા પામી છે, એ આપણી માતૃભાષાની દેન છે.. તો આવો ગુજરાતી ભાષાને વેગવંતી કરીએ.

બસ, કરૂણતા એટલી કે ગુજરાતી હોવા છતાં ગુજરાતીને બચાવવાની વાત કરવી પડે છે !! શું ધોધમાર વરસાદમાં તૃષ્ણા હોય ખરી ??? કઇંક એવું આપણી ભાષા સાથે બની રહ્યું છે. સાહિત્યને બચાવવા રેલીઓ કાઢવી પડે એના જેવી બીજી શરમજનક વાત કઈ હોઇ શકે ? બાળકોને જે માધ્યમમાં ભણાવવા ઇચ્છતા હોય એ છૂટ, કિન્તુ ગુજરાતી ભાષા ન જ છુટવા દેવી જોઇએ. એક અભિયાન એ પણ ચલાવવા જેવું ખરું કે, અંગ્રેજી માધ્યમમાં ગુજરાતી ભાષા ફરજિયાત પણે શીખવવી.. ચાલો એ દિશામાં વિચારી ઋણ અદા કરીએ.

છેલ્લે મારા શબ્દો મારી ભીતરમાંથી જે કંઇ સાહિત્ય સ્વરૂપે નિકળતું આવે છે એ મારી માતૃભાષાને આભારી છે

જય જય ગરવી ગુજરાત.

મળતા મળી ગઇ મોંઘેરી ગુજરાત, ગુજરાત મોરી મોરી રે.

21 ફેબ્રુઆરી : માતૃભાષા દિન

માતૃભાષા દિવસની શુભેચ્છાઓ

અસાઈડ

સ્કીમ

“સાહેબ એક સ્કીમ છે !

૫ થી ૧૦ સેકંડ માટે શાંતિ,

આશ્ચર્ય ની સાથે વળતો સવાલ

શેની સ્કીમ ?

તમે ફલાણાભાઈ નું નામ તો સાંભળ્યું જ હશે ?.

ના, એ વળી કોણ ?

સારું જવા દો ! તમારા માટે નથી !

ઉભા રહો આવ્યા છો તો સ્કીમ તો સમજાવતા જાઓ.”

(સંવાદ કાલ્પનિક છે)

અને પછી લાલો લાભ માં ભરબજારે લુંટાય !

અંતે કંટાળી ને આ બ્લોગ અપડેટ આપી રહ્યો છુ.

કોઈ વ્યક્તિ તમને કલ્પવૃક્ષ બતાવે અને પછી ખબર પડે કે આપણી સાથે તો કલરકામ થયું છે ત્યારે કેવો આઘાત લાગે. આજે એક વ્યક્તિને મળવાનું થયું અને ધીમે ધીમે માહિતી નીકળતી ગઈ એના અમુક અંશો અહીં રજુ કરું છુ. દરેક વ્યક્તિને રૂપિયા કમાવા હોય છે અને એજ મહામેહનતે કમાયેલ રૂપિયા કોઈ બીજાના વિશ્વાસે મુકીદેનારા તમારામાંથી કેટલા હશે ખબર નહિ.

“અમે પુરા દસહજાર રોકેલા ફલાણાભાઈ ના વિશ્વાસે, વ્યવહારમાં પાક્કા તારીખ થાય એટલે એમનો માણસ વ્યાજ આપી જતો અને એ પણ “આટલા” ટકા દર મહીને. અને પછી સમાચાર મારફતે ખબર પડી એ ફલાણાભાઈ આટલા નું કરી ને ગયા.

શું વાત “આટલા” ટકા ? વર્ષના કેટલા થયા, આટલું તો બેંક પણ રીટર્ન નથી આપતી.

પછી સ્વબચાવમાં “છતાં એ ફલાણાભાઈ આટલું રીટર્ન આપીને ગયા”

પણ સાહેબ મૂળ તો આ ગુનો કેહવાય. અને જ્યાં ગુનો છે ત્યાં સુખ શાંતિ નથી.

પણ શું કરીએ જે થવાનું હતું તે થઇ ગયું.”

આમ ને આમ નાના રોકાણકારો ભોગ બનતા રહે છે. આવા ફલાણાભાઈ જેવા ઠગની રૂપિયા ડબલ કે ત્રિપલ કરવાની લાલચે રોકાણકારો આવા લોકોથી છેતરાય છે.

અરે પેહલા જુવો તો ખરા ગ્રાઉન્ડ રીયાલીટી શું છે, એ ફલાણાભાઈ કોણ છે એનો ઈતિહાસ શું છે, એ વ્યક્તિ શું કામ તમને આટલી બધી વસ્તુ કે લાલચ આપી રહ્યો છે. શું એ વ્યક્તિ સાચો છે કે ખોટો એની ઉલટતપાસ કરો. કઈ વાંધાજનક લાગે તો તેવા લોકોને રોકવા માટે યોગ્ય પગલા લો જેથી કરીને બીજા વધુ લોકો તેનો શિકાર ના બને.

સ્કીમ, સટ્ટો, જુગાર, ડબ્બો, વ્યાજખોરી અંતે લોકોના ઘર બરબાદ કરે છે. આવી વસ્તુથી દુર રહો અને આ દુષણ ફેલાવનાર લોકોની સર્જરી કરો.

શક્ય એટલું નાણાકીય આયોજન કરો, પોતાનો એક નાનો કે મોટો પોર્ટફોલિયો બનાવો, બચત કરો, પેટ્રોલ ઓછુ બાળો. અને અંતે યોગ્ય જગાએ લીગલ પ્રોડક્ટ્સ માં રોકાણ કરો.

અસ્તુ.

ઓપ્શન ટ્રેડીંગ સ્ટ્રેટેજી

આ બ્લોગ કોઈ નવા નિશાળિયાએ વાંચવો નહિ. જે ઓપ્સન ટ્રેડીંગ ના જાણકાર છે તેમના માટે જ લખેલ છે.

સ્ટોક માર્કેટમાં અને એમાંય ફ્યુચર ટ્રેડીંગમાં સૌથી વધુ લોકો ગોથા ખાય છે. હવે ફ્યુચર ટ્રેડીંગમાં પણ ઘણા પ્રકાર હોય છે એમાંથી ઓપ્શન ટ્રેડીંગનો આજકાલ ક્રેઝ વધુ છે, પણ એના માટે ઓપ્શન છે શું ? એને સમજવું જરૂરી છે.

શબ્દ પરથી જ ખ્યાલ આવી જાય, “ઓપ્શન” એટલે વિકલ્પ. ફ્યુચર ટ્રેડીંગને જેમ વાયદા કેહવાય તેમ ઓપ્શન ટ્રેડીંગ ને બજાર માં કોલ – પુટ ના નામે ઓળખાણ મળેલ છે. કોલ પુટ એટલે શુદ્ધ ગુજરાતી માં તેજી – મંદી, અથવા કોલ એટલે લેવું, ખરીદવું અને પુટ એટલે મુકવું અથવા વેચવું.

આમતો ઘણા ડેરીવેટીવ્સ એનાલીસ્ટ પાસે તેમની અલગ અલગ સ્ટ્રેટેજી હોય છે પણ મુખ્યત્વે ઓપ્શન ટ્રેડીંગ કરતી વખતે તમારે કોઈ ચોક્કસ સ્ટ્રેટેજી ઉપયોગ કરવી હિતાવહ છે.

બજારમાં મુખત્વે ૨૨ કરતા વધુ સ્ટ્રેટેજીથી કામ કરી શકાય છે પણ એમાંથી થોડીક જ ફાયદાકારક છે જે આજના બ્લોગમાં નોંધેલ છે.

ઓપ્શન ટ્રેડીંગ કરતી વખતે અમુક વસ્તુ નું ધ્યાન રાખવું જરૂરી છે, જેમાં ઇન્ડેક્ષ ઓપ્શન, સ્ટોક ઓપ્શન, બાયર, રાઈટર, કોલ ઓપ્શન, પુટ ઓપ્શન, ઓપ્શન પ્રાઈઝ / પ્રીમિઅમ, એક્શ્પાઇરિ ડેટ, સ્ટ્રાઈક પ્રાઈઝ, ITM , ATM અને OTM મુખ્યત્વે છે. (આ વાક્યમાં લખેલ અમુક શબ્દની સમજણ ના પડે તો તમારા બ્રોકરને પૂછવું).

નીચે અમુક સ્ટ્રેટેજી નો ઉલ્લેખ કરેલ છે જેમાં રોકાણ નું જોખમ મર્યાદિત છે જયારે નફા નો ગુણોત્તર અમર્યાદિત છે.

સ્ટ્રેટેજી ૧ : લોંગ કોલ ( કોલ ખરીદવો)

સ્ટ્રેટેજી ૨ : સિન્થેટીક લોંગ કોલ ( બાય સ્ટોક , બાય પુટ )
જયારે તેજીનો માહોલ હોય ત્યારે ઉપયોગી , એક બાજુ સ્ટોક ખરીદવા જયારે બીજી બાજુ જે સ્ટોક ખરીદ્યા છે તેના પુટ પણ ખરીદવા. આ સ્ટ્રેટેજી રોકાણ ના ઇન્સુરંસ જેવું કામ કરે છે તેમ કહી શકાય.

સ્ટ્રેટેજી ૩ : લોંગ પુટ ( પુટ ખરીદવા)

સ્ટ્રેટેજી ૪ : લોંગ સ્ટ્રેડલ ( એક જ વાયદા ના કોલ અને પુટ ખરીદવા )

સ્ટ્રેટેજી ૫ : લોંગ સ્ત્રેન્ગલ ( OTM પુટ ખરીદવા + OTM કોલ ખરીદવા)
OTM એટલે આઉટ ઓફ ધી મની ઓપ્શન.

નોંધ : જયારે પણ ઓપ્શન ટ્રેડીંગ કરો ત્યારે રિસ્ક કેટલું લઇ શકો છો તે જોવું , અને ખાસ ટાર્ગેટ અને સ્ટોપલોસ થી જ ટ્રેડીંગ કરવું.

અસ્તુ.

નાણાકીય આયોજન

આજના સમયમાં આયોજન દરેક પરિસ્થિતિ માં જરૂરી છે પણ એનાથી પણ વધુ મહત્વ નાણાકીય આયોજનનું છે. નાણાકીય આયોજન તેના વ્યુહાત્મક લક્ષ્ય અને હેતુઓ હાંસલ કરવા માટે તેમજ તે લક્ષ્યો કેવી રીતે સિદ્ધ કરવા તેના માટે કાર્ય કરે છે. સામાન્ય રીતે દરેક કંપની નાણાકીય યોજના બનાવ્યા બાદ તરત જ તેના અમલમાં લાગી જાય છે. દરેક કંપની કે બીઝનેસમેન પેહલા પોતાના લક્ષ્ય નક્કી કરે છે અને ત્યારબાદ આ લક્ષ્ય સિદ્ધ કરવા માટે #AssetAllocation કરે છે. #AssetAllocation એક રોકાણપદ્ધતિ છે જે નાણાકીય આયોજન કરતી સમયે ઉપયોગી નીવડે છે.

નાણાકીય આયોજન માં અમુક પ્રવૃત્તિ નો સમાવેશ કરવામાં આવે છે જેમાં મુખ્યત્વે બીઝનેસ વાતાવરણ , લક્ષોની પુષ્ટિ, નિર્ધારિત લક્ષો સિદ્ધ કેવીરીતે કરવા અને તેના માટે જરૂરી સાધનો ની ઓળખ, જરૂરી સાધનો નું વર્ગીકરણ, દરેક પ્રકાર ના ખર્ચ ની ગણતરી, બજેટખર્ચ, બીઝનેસમાં રહેલ જોખમની ઓળખ વગેરેનો સમાવેશ થાય છે.

આજના સમયમાં દરેક વ્યક્તિ વધુ માં વધુ નાણા કઈ રીતે કમાવવા તેની ફિરાક માં રહે છે, પણ નાણાની કમાણી બાદ એ નાણા નું કઈરીતે આયોજન કરવું અને એજ ફાજલ રૂપિયા (જો આવક સારી હોય તો) ને ચોક્કસ નાણાકીય instrument માં કઈ રીતે રોકાણ કરવું તેની સમજ ઓછી છે. અત્યારે બજારમાં મ્યુચલ ફંડ , સીપ, પોસ્ટ, વીમા જેવી પ્રોડક્ટ્સ હાજર છે.

“જો તમારી ઉમર નાની હોયતો અત્યારથી જ પોતાની કમાણીની રકમનો અમુક હિસ્સો બચત કરો જે તમને તમારી ભવિષ્યમાં વધુ મદદરૂપ સાબિત થશે”. આ વાક્ય દરેક ફાઈનાન્સિયલ પ્લાનરના મુખારવિંદમાંથી સંભાળવા મળશે. અમને પણ અમારા ભણતરમાં આ વાક્ય હથોડા મારી-મારીને અમારા મગજમાં ફીટ કરાવડાવ્યું છે.

હું જયારે ૧૮ વર્ષનો હતો ત્યારથી માર્કેટસાથે આડકતરી રીતે સંકળાયેલ છુ, અને એવી ઘણી સત્યઘટનાઓ છે જે મેં મારા વ્યવસાયમાં જોઈ છે અને એના અમુક અંશો તમને પછી ક્યારેક જણાવીશ. આમતો ઘણા લાંબા સમયથી બ્લોગીંગ બંધ હતું પણ હવે જે કંઈપણ પોસ્ટ લખીશ એ દરેકના માટે ઉપયોગી નીકળે એવો પ્રયત્ન કરીશ.

અત્યારે બસ આટલું જ,

અસ્તુ .